No ciclo de conferencias Faladoiros en Comercio, o mércores 6 de novembro, Carmen Rodríguez, presidenta de AGACA e vicepresidenta da cooperativa CLUN, así como presidenta da asociación ‘Mulleres de Seu’, impartiu unha charla sobre o empoderamento da muller cooperativista no medio rural. Na súa intervención, destacou os avances en igualdade de xénero no sector agrario de Galicia á vez que abordou os retos que quedan por resolver para garantir unha igualdade real no medio rural.
Carmen transmitiu con mestría os aspectos fundamentais dunha tarefa complexa que require compatibilizar as tarefas no campo, a xestión da cooperativa e a activa participación nas actividades de representación. A súa actitude accesible creou unha atmosfera amigable, convertendo a conferencia nun debate animado que trasladou aos alumnos das aulas ao mundo rural para tratar o tema da igualdade de xénero no ámbito empresarial.
As opinións dos asistentes mostran o éxito acadado con esta iniciativa:
“Un dos momentos máis emotivos foi cando Carmen, a primeira muller en presidir a Asociación Galega de Cooperativas Agroalimentarias (AGACA), explicou os desafíos de traballar nun sector historicamente masculino. ‘Todos os presidentes anteriores foron homes, e abrir este camiño foi un desafío e un orgullo’, sinalou. Isto xerou preguntas entre os alumnos, interesados na súa visión sobre a igualdade de xénero no sector e preguntáronlle se algún día sería posible unha igualdade completa entre homes e mulleres no ámbito rural. Carmen recoñeceu que o camiño é difícil, pero que cada avance representa un paso cara a un cambio necesario.” Eugenio Franco
“Carmen é un exemplo para seguir e, como ela díxonos, é unha persoa con moita sensibilidade, e transmitíunolo perfectamente. Encantaríame que en todas as empresas houbese unha figura como ‘Mulleres de Seu’, onde as mulleres podamos obter o apoio que podamos necesitar e a motivación necesaria para lidar co que lamentablemente é unha loita e non unha realidade na nosa sociedade.” Carla Otero
“Un aspecto especialmente relevante da charla foi a reflexión sobre como en moitos casos, as propias mulleres provenientes dun ambiente rural, non se expuñan a posibilidade de formarse ou especializarse en temas relacionados á explotación, máis aló das barreiras culturais e sociais como a carga familiar e as tarefas do fogar que adoitan recaer na muller, moitas veces son elas mesmas as que non consideraran a posibilidade de formarse ou desenvolverse en novos ámbitos. Isto chamou a miña atención, reflicte como as normas tradicionais limitaron durante xeracións as aspiracións das mulleres, neste caso, no ámbito rural.” Alejandra Ciasca
“Gustaríame comentar un aspecto que Carmen demostrou simplemente coa súa presenza. Un dos elementos que máis me chamou a atención é que non tiña ningún medo para mostrarse como unha persoa sensible e simpática. Afeita a ver como constantemente retrátase a unha muller con poder como autoritaria, seria ou mesmo cruel, a figura de Carmen demostra que o poder na muller non se ten que traducir en maldade, senón en responsabilidade, atención nos demais e constancia.” Iria Palacios
“Cando un dos alumnos preguntoulle se non lle preocupaba que a nomeasen vicepresidenta por ser muller no canto de por as súas capacidades, esta contestou que lle era indiferente. Que iso era algo que non lle concernía nin dependía dela. Nun sector onde as mulleres non reciben nin aproveitan as mesmas oportunidades que teñen os homes, ela foi elixida vicepresidenta, e se alguén o fixo sen atender ás súas habilidades de liderado, negocio, ou o seu valor como persoa, na miña opinión, co tempo quedaría máis que convencido de que á parte de ser muller, é capaz de facer o mesmo ou máis que calquera outro home no que puidese pensar. E se desempeña o seu cargo a metade de ben do que deu a charla, non me queda dúbida en que o futuro das mulleres no sector agro-gandeiro é esperanzador.” Daniel González